admin Ненан мотт, дай г1иллакх дицдича хуьлий вай нохчи!
Кху деношкахь Мехка-Дас, Кадыров Ахьмад-Хьаьжин во1а Рамзана Нохчийчоьнан 1едалан а, динан а дай цхьаьнакхетарехь мехала кхеташо д1айехьира. Дийцаре диллинарг таханлерчу заманахь зуда йалоран а, йо1 маре йахаран а, и сел мехала, экаме йолу нохчийн халкъа дахаран кеп хийцайаларца доьзна къамел дара. Б1ешерашкахь вайн дайша, дедайша халкъан 1адаташца а, шар1ан низамца а нисдина, дуьстина, шен барам а болуш лерина лелийна долу г1иллакх г1елделла карадо тахана. Йоь1ан, к1ентан захало дийцаран а дара шен цхьа ша тайпа оьзда некъаш. Йо1-к1ант цхьаьнакхетар шаьшшиъ долуш ца хуьлура. Йо1аца а, к1антаца а цхьацца шайн нийсархо волуш йа хинйистехь, йа йоь1ан лулахойн х1усамехь хуьлуш дара. Дагайог1у сайн жималла а. Йоь1ан б1аьра хьажа лууш гуо туьйсура, амма йо1 йуьхьдуьхьал ца хьожуш, д1айоьрзура. Иштта дара оцу йаханчу заманахь захало дийцаран г1иллакх. Зуда йалийча х1оттош долу той а, синкъерам-ловзар а дара шен низам долуш.
Нохчийн оьзда мехкарий халкъан духарца, хаза-товш йолчу г1абалица кечйелла йог1ура ловзаре, синкъераме. Нускалан духар а хуьлура изза халкъан г1абали. Таханлерчу хенахь европейски нускалан духар ду вай цхьа да ваххал мах а лой, цхьана денна «на- прокат» йахьаш йолу коч, пхи метр хиллал лаьттах текхаш йолу куча йист шина-кхаамно схьалаца йезаш. Эрна дуй т1аккха вайн Мехка-Дас вайга бохург? Вайн доцу, аьр вай — «г1иллакхаш» — схьа ма лийца, нохчийн 1адаташца, динан арканашца ца дог1уш дерг йуккъера д1адаккха бохург? Томан а, урдон а ма ду хила дезаш цхьа доза, цхьа низам, оццу синкъераман а, ловзаран а санна. Нохчийн мотт а вай ийбина бийцича, г1илллакхаш а вай дицдича хуьлий вай нохчий?
А.Магомедов