admin Хьанал къинхьегам безачу нахаца боккха ларам лелийна генара хенаш кест-кеста дагаоьху. Вайн пачхьалкхан дахарехь дукха хийцамаш хуьлучу муьрехь, махкахь даьлинарг карладолу.
Дас, нанас шайн доьзална диканиг хьоьхуш хилча, оьшуш йолу терго йича, диканиг совдолу. Дахар довза кхиъна доцчу бераша кхана-лама х1ун лелор-техьа бохург дагадар мехала дара. Болх-м х1унда буьйцура, белхан хьелаш галдохуш, талхош болчу нахах лардан дезаш уьш хилча.
Дукха хан йоцуш тхайн юьртарчу заправкехь гина сурт ларт1ехь ца хийтира, 9-10 шо хир долу кегий бераш машенашна гонахьа хьийзар, цхьана бакъонца дог1уш доцу осал х1ума хетарна.
Х1инцачул к1ира хьалха бензин дуттуш бераша сайн машенах даьккхина сиз дийца ца воллу. Бакъду, д1адовла олуш д1акъахкийча, машенахь хилла къона зуда реза йоцуш сайга хьажар, царна пхиппа туьма ахча далар гина волчу суна, айса дийцина хилларг эрна дуйла кхийтира.
Цхьаммо ца бохура х1ара берийн меттиг яц. Дахарехь сом доцург 1алашо йоцу доьзал кхиар, Дала тохар ду. Цунах кхета лууш берш к1езиг хилар гучуделира. Иштта долчу берашка ламаз де, харцахьа ма лела, г1иллакхе хила олурш, къезиг хуьлу. Шадерг юкъаралло деш хилча, гергарчу нахана т1ехь х1ун декхарш дуьсу, бохучу хаттарна жоп дала дезаш хилар дагадаийта-м дезара.
Вайн дайша эрна олуш ца хилла — дика бераш-моз, вон бераш-ц1оз, саг1а доьхучул а, беж1у хилар тоьлу… Царех г1оьнчий бан лууш долчу дас-нанас, кертахь г1уллакх дайта деза, соьмашка девллачу берийн хьовхачу кхетамна диканиг девзар доцийла хиъна. Дешарна букъ берзийна, шайн лааме девлча, кхана байтамал баха ца дезаш ледар хьал кхолладаларх, лардала дезар дагадаийтина.
Б.Шахмурзаев